Reports

BWA General Council Report

Board of Trustees phasakna leh na thumsakna manphate uh hangin July 5-16, 2002 sung BWA General Council, Serville, Spain ah BOT Chairman Upa G Thangchinlian tawh kava kihel thei uhi. July 5 a kuan July 16, 2002 in damtakin inn kong tungkik thei ua, noute leh I Pa Pathian tungah kipahthu kong gen uhi. Sum-le-pai lama giautauhuai sak ziakin hawh ding leh hawhlouh ding thupuk mawh zen in tawlkhat ki om hi. Himahleh, Toupa a muanhuai a, a hun takin a kisam ding sumlepai banah zinna dia thil kulte baihlamtak a saifel a hong ommanin Toupa min ka phat uhi.

BWA General Council bel Kumsim vaihawmna khawmpi hi a, gam 65 apan mi 504 paikhawm hi. Departmental Committee tuamtuamte July 8, 2002 in kipan a, July 9, 2002 apan vaihawmna neih ahi a, sunnung lam teng committee tuamtuamte meeting in zui den hi. Toupa ompihna hangin BWA masawn in kalsuan zel a membership ngen zong omden lai hi. Vaihawmna hun patma in Biakna leh Devotional message nuamtaktak mi tuamtuam in hong neihpih uhi. Council leh Academic and Theological Education Workgroup a member hihnate banah Baptist World Aid ah kava telkha uhi. Academic and Theological Commission in Laisiangthou sinsiamna leh khalam khantouhna tonkhawm gige ding ahihna thupi in nei uh a, syllabus leh curriculum etkhawmna hunin hong zat pih uhi. Tuabanah, Theological Seminary puahphat dingdan tuamtuam zong hong genpih uhi. Council meeting bel committee leh commission tuamtuam apan Agenda Committee in a etkhawm nunga Resolution Committee in a thupukna gelhte approval piakna dan in hong zatpih uhi.

Baptist World Aid in Funding goal (project) tuamtuam tawh kisai hong bawl pih ua, ei gam lam ading zong khenkhat om ahihmanin a tup uleh ngim banga sepsuah ahihtheihna dingin a nasepna uh thumna in phawk chiat ni. Hihte a sum zon tawm ding (fund raise) ahihmanin mite lungtanga Pathianin thu a gen nadingin thumna in thei chiat ni.

Rev P Bonny Resu in Rev Jason Das, President ABF, Rev Dr Alan D Stanford, General Secretary, NABF leh EBC palaite annekpihna hong nei a, EBC in BWA Council na ngai poimawh ua, keimah zong hong thuap hoih na hihmanun ka kipak mahmah. Khawmpi hawh lah sawmlou, deih ngetna lam kia uangbawl pen thil nuamlou pi ahi. EBC te ettontak na hi uh chiin kipahpih thu hong gen hi. July 11, 2002 in Regional Fellowship meeting tuamtuam om hi. Rev Jason Das makaih in ABF min a kithuahkhawmna hong neihpih uhi.ABF pen tualsung saptuam 22,000 Convention 53 gam 21 te kigawmkhawm a kipawlna ahi. A thiltup:

a) Asia-Pacific huamsunga om Baptist saptuamte kithuahkhawm a sepkhawm ding,

b) Tangthupha phuanzakna a kitokthoutuah a ki panpihtuah ding,

c) Nasepna kiguangte kikumkhawm/geelkhawma kihuhtuah ding,

d) BWA adinga kipawlkhawmna hiang poimawh leh phatuam tak hih ding ahi.

A gam tanchin: Spain gam ahihleh gam kumlui, khangtou leh hausa mahmah khat ahi. A gam sum Euro a kichi a, US $ tawh a kikim phial hi. Spanish pau a tualleng pen a, sappau zangthei om zezek. Sabiak lam ah Roman Catholic saptuam 95% ahi ua, amau lakah zong 25% kia sabiak a muanhuai chih ahi. Baptist leh Evangelical saptuam kigawmkhawm in 0.25 % vel hi uhi. A gam pumpi ah Baptist saptuam (Biakin) 56 om a, full communicant member 8,500 om uhi. Khawpi leh khawta 7000te ah Evangelical Khristian khat beek omlouhna tamzaw chih ahi. Hih munte a mission centre hon ding Baptist saptuam' thiltup ahihmanin thumna in phawk ni.

Toupa hehpihna leh Saptuamte deihsakna ka tante uh thupi kasa ua, kipahthu gen in Toupa min ka phat uhi. Gam tuamtuam, thupi leh kilawm tampite i muh chiangin zong eite Toupa'n hong it zenzen hampha na maizen hang e! chih phawk thakthak in om hi. Mite'n zaw Toupa aneih kei uleh zong leitung bek ah hampha uh kasa a, eite adin hamphathuai diak ka sa hi. "Ka Toupa zaw hoih penpen e, Linglukhu khusak mah le uh." Thupina Toupa kia in tangta hen.

Rev L Kham Kho Lun

Executive Secretary, EBC.

Atung

Reports

BWA General Council Report

Naupang Chialpina Report