Dotna leh Dawnna

Dawngtu: Rev N Vungzasin D/S, Lamka Division

Dongtu: Upa K Gouzagin, Upper Lamka

 

Dotna: Mathai 16:18 a Jesu'n "hiai suangpi" a chih amah mah kigen hia? Ahihkei leh Peter genna hiam?

 

Dawnna:

    Hiai thu ah gendan leh ngaihdan chi nih a om thei mah hi. Himahleh Commentary lian deuh leh a tamzaw te gen dan in Peter kichi suang (stone) chihna ahi, Jesu bel suangpi (rock) ahi. Saptuam lamtu leh bawltu Jesu ahi a, mihing ah saptuam lam ahi ngei kei. "Nang Peter, suang na hi a, himahleh "hiai suangpi ah ka saptuam kalam ding" Jesu'n a chih chiangin, Jesu'n amah saptuam kilamna bulpi, kingakna suangpi mah kigen ahi. Hiai Peter pen Simon Peter, Barjona ahi a, saptuam lamna dinga agent/vanzat ahi. Himahleh saptuam kingakna suangpi tuh Khrist mah ahi chih a muanhuai hi.

 

    Khenkhatte gendan in, Peter gen ahi. Hiai leng Peter tungtawn a saptuam masa hong khangkhia ahihman a ngaihdan kigen ahi a, himahleh Peter in saptuam phuhna ding leh Gospel ki bulphuhna thu gen in, Jesu Khrist mah a kingakna ahi. Tua ahihman in "hiai suangpi" kichipen "Jesu Khrist mah genna a hihdante a ginlelh huai kei.

 

Dotna: Luke 17:34-36 sunga lupna khat a mi 2 lumkhawm, numei nih ansu khawm, pasal nih loukuan khawm, hiaite khat lak a om ding a khat nawtsiat a om ding a chih chitchiat bang genna ahia?

 

Dawnna: Hiai a "Khat lak in a om ding a, khat nawtsiat in a om ding" chih in khen teitei ding chih a tup a hi kei a, himahleh lupna khat a mi nih omte, numei ansukhawmte leh pasal nih lou a kuante lak a khat nawtsiat a om ding a, khat lak a om ding a chih chiangin "Pathian in Amah ate a thei chian mahmah ding a, tua ahihmanin amah ate kia ala ding a, amah a loute a nawse ding chih a hah gen nop pen ahi zaw hi. Pathian in amah ate midangte lak a a-omte athei chian mahmah chih atheihtheih hi.