September 2002
Volume 38, Number 09
September 2002
Volume 38, Number 09
Tulai khawvel i et chiangin Pathian apan kitolh gamla hiaihiai hileh kilawm ! Dan leh thupiak nei napi, a petute leh a bawlte’n lah zuilou ! Thukhenmite hun lai mah bangin “...kumpi himhim a omkei ua, michih in amau phasak lam zongin a gamtang mai uhi” chih tawh ki lamdang nawnlou hi (Vaih 21:25). Pathian thu in a gendan zuih sangin tuhun tawh kituak a hindan kidelh zawta. Huhamna leh hiamgamnate mihing hindan hita mai leh kilawm hial hi. Koimun peuh ah zong thuneihna nuaia om sangin mahni thuneihna deihna lian mahmah hi. Pathian nasepna ah zong makai/pitute tuah ding khemna tuamtuam om thei ahihmanin mahni chiat kiveelna dingin anuai ate enkhawm ni:
Khatna: Makaihna dinmun ngah kichi lawhchinna khat ahi. Himahleh, dinmun, thuneihna leh mawhpuakna tawh tonkhawm ahihlam phawklouh a baihlam mahmah (Lk 6:39; Jak 3:1). Dinmun khat peuh a dopkai a om hun a lawhching kisa pahte lawhching taktak khatheilou nak hi. Dinmun pen nasepna ding ahi pan hi.
Nihna: Makaihna pen kisaktheihpih khak theih ahi. Khenkhat in dinmun khatpeuh angah chiangun “ka chin a ahi” chiin ngaihsun kha uhi. Pathianin kisaktheihna zadah mahmah hi (Pau 16:5; 11:2; 15:25; 16:18). Hiaite apan eimah kiveel ni - a) Eisanga niamzaw a itheihte tawisanga om chiangin bang lungsim inei a? b) I dikna hinapi zuauthu a dema i om chiangin bang lungput inei a? c) Gensiat a i om chiangin bang i ngaihsun a? Toupa mai ah i tun thei zel hia? Ki veel ni.
Thumna: Midangte hazat khak a baihlam mahmah. Hiai hi kisaktheihna sanggamnu a kichi hial hi. Ei sanga midangte lawhching zaw, dinmun hoih zaw, pahtak zawk a om hunin i thangpai maimah hia? Tuabang mi ihihleh hazat-hat hiding ihi (Nam 11:28,29). Hiaite’n thumanlouhna a tun a, siatna tamtak a sukha thei hi.
Lina: Minthan utna leh mahni poimawh kisakluat khak theih ahi. Mikhat a nasep hoih mana a minthan khelhna a hipah kei. A nasepte a ki-otsakpih leh khelhna ahi (Jn 3:30). Khenkhatte lah midang sanga Pathian tawh kinai zaw, muanhuai kisa zaw a kuamah dang muan neilou bang om leuleu hi. Hibangte khelhna lian tak ahi (I Kor 1:26-31). Mihing maipha zong a, makai hihna letden sawm khak a baihlam mahmah nawn. Hih zong midangte thusimlouhna khat ahihmanin a dikkei hi (Pau 29:25). Jesu Khrist in zong mihing dan leh Pathian dan nuai a hong kituklut bangin en zong Amah etton in i nei ding uhi.
Jesu Khrist nungzuihna a makai hihna innsung, khotang leh saptuam a len peuhmahte atung a i gen tamloute apan kiveelpha thak lehang ichi hi. Khemnate ze tuamtuam in kilang thei a, theihkhelh zong baihlam mahmah uhi. Tuate mah theisiam a i zatdik leh lawhchinna hi ding a, midangte adia vualzawlna luanlutna hihtheih ahi. Pathianin vualzawlna tuntu makaite hidingin hong ompih chiat henla, Tanchinhoih midangte kianga i tangkoupih nung nangawna kipahman mutaklou a koih a om khalou dia pilvang thei dingin Aman hong makaih hen aw. Ì