H Vungkhai
Child Worker
Toupa'n hon khotuahna ziak leh Naupang Heutute hahpanna ziakin kum 2002 "NAUPANGTE NI" zangthei nawn a i om manin Pathian kiangah kipahthu i gen hi. Hiai Naupangte' Ni hi EBC saptuam omna peuhah manphatak a izat chiat leng ka lam-en hi.
Hiai Naupangte' Ni kichi Department dan a hong dinkhiakna hun sawtpi hita mahleh ani leh hun geih kitel takin gen haksapi in a om hi. Himahleh hiai "Naupang Pawl kichi pen aom ngei ahi chih leh, hoihtak a paitou zel na ahi chih tuni tanpha in mit a muhtheih in a om hi. Nidangin Naupang Pawl kichi atuam in a pai kei a, Tuailai toh kigawm in Young Christian Advance Rally (YCAR) chiin minloh in a om hi. Kum 1933 in English sap Mr H.H. Coleman in tua lama sem dingin Pastor Kaineng, Child Evangelist chih minvohin appointment ana pia hi. Pastor Kaineng nasepna a paitouh zel laiin Naupang leh Khangdawngte toh lomkhat a zatkhawm theih ding deihna in Pu Siamkung leh Pu. Tunvum, Mission Compoundte makaihin YCAR chih kum 1947 in amin dingin a hon phuakkhia uhi. Hiai YCAR Khawmpi masapen 1949 kumin Lamkatung ECC (EBC)ah kinei hi. Kum 1950 in ECC(EBC) Khawmpi Lian in YCAR kichi Official in pomna honnei ua, hunbit a sem dingin Mr. Langpum hon sehsak uhi.
Kum bangtan hiam YCAR chih ki minvohin makai tuamtuam ten ahon semtou ua, kum 1973 YCAR Khawmpi a kizat zawh in, tua min pen zat in a om nawn takei hi. Himahleh, Naupang Pawl kichi pen hoihtak a paitou zel in, Sunday Skul bang leng paitou zel ahih manin kum 1978 ECC (EBC) Khawmpi Lian in Naupang Pawl Headquarter a heutulian dingin Rev N. Nengzakhai, Director of Child Evangelism chih min khusak in a hon bawlsak uhi. Tuakhit in Heutu tuamtuam kineitou zel in, 1995 kum pen ECC (EBC) Khawmpi Lian in "NAUPANGTE KUM" chi in hon puansak ua, hiai toh kiton in England gama Sunday Skul ki phuhkhiak hun Sept, 07, 1785 theih gigena dingin chiin Sept. 07 ni pen Naupangte ni chiin a hon puansak ua, tuani geih pen Pathianni hi khollou ahih manin, tuani naihpen Pathianni masapen Naupangte' Ni a zat ding chiin a hon lemsakpih bang un tuni tanpha in kizangtou lai hi.
NAUPANGTE' MANPHATNA:
1. Jesu'n Naupangte manthat ding a phalkei (Mk 10:13-15, Matt 18:14; 19:14): Naupang neute Jesu'n a-it a, a nungzuite'n a deihlouh ua atai lai un leng, Aman a nungzuite kiangah Naupang neute ka kiangah hon paisak un, achi hi. Tua kia leng hilou in a angpom a, Vangam Naupang neute ading ahihdan mipite kiangah a gen hi. Tua ahih manin Naupang Neute manthat ding deihlou a it a kemtu Jesu ahi.
2. Kipahpih ding ahi (Matt 18:5; Mk 9:37): Jesu'n Naupang neute a it a, a kipahpih hi. Midangte leng Naupangte kipahpih ding leh tua bang hihte Amah kipahpihte ahi chih agen hi. Tua ahih manin Naupangte i kipahpih a, amau manphatnate itheihpih ding a kisam hi. Tua hileh Jesu deihdan semkha hiding i hi.
3. Chi thupitak hi ding (Gen 21:18): I saptuam, I inkuan, I gam leh nam thupina ding leh chidam nading Naupangte khuta kinga ahi chih i phawk ding ahi. Toupa'n Ismael naungek ahihlaiin a vualjawl a, chi thupitak hong suakin, tuniin leitung pumpi luahsuak thei phial in Ismael suante a pung ua, mi hausa leh misiam tampi a hongpian bangin, naupangte Toupa'n a hon vualjawl leh chi thupitak suangin, nam pumpi adinga suangphum pawimoh tak suakthei hi.
Hiai atung a thu tamlou i gen a kipan in Naupangte' Ni hong kipat dan leh Naupangte manpha ahih dan uh theihin a om a, Nu leh Pa leh Naupang Heutu tengtengin leng Naupangte manphatna thei a, awlmoh thak chiat dingin leh Toupa'n leng amaute tung a nasep ding mohpuakna honguan ahi chih Naupangte' Ni izat tungtawn in i theihthak uh deihhuai ka sa hi. Toupa'n hon vualjawl hen. Ì